Je żech ôptymista

Ślōnskie serce mŏ fest rōd, kiej we ekstraklasie prziłażōm take szpile jak Gōrnik Zŏbrze vs GKS Katowice. Mianuje sie to ślōnskim klasykiem i niy dziywota, bo to u nŏs, we złoto-modrym Hajmacie, richtich srogie manszafty, co majōm zŏca setek kibicōw. Niy bydymy ale sam gŏdać ô historyje fusbalu, co robiôłch przōdzij, kiej cajtung był jeszcze we papiōrze (terŏzki sōm my „eko”, a strōmy we Murckach mogōm sie dychnōnć). Powiym wōm ô tym, co terŏźnie.

Bo terŏzki widzã trzi nasze manszafty we tabuli ekstraklasy (sorry Rakōw, wy niy), a durś czujã luz. Mōm mało. Marzã, coby było wiyncej i wiycie co? Czujã, że tak bydzie, a edycyjõ 2024/25 to inŏ forszpajza. Slōnski klasyk to srogi fest, nale to niy ma Wielgie Derby Ślōnska (jak pedziŏł Poldi), kiej hercklekoty sōm take, że cołkŏ Metropolijõ parzi we piŏku kamelka. Ôkrōm tego richtich festelny je tyż szpil Ruch vs GieKSa, co dŏwŏ nōm tukej spōlne punkty. Rŏz, szpile kiej manszafty sie niy przajōm sōm gryfniejsze. Dwa, we ekstraklasie musi być Ruch. Tedy bydzie szpas.

Gŏdołch, iże je żech ôptymista, nale to niy ma, że sztajgniyńcie Ruch dostanie choby erplich. Czekŏ go moc utropa, nale fusbalery pokazujōm, co majōm grajfka i możno bydōm we elicie kole Gōrnika, GKS-u i Piasta. Ja, wiym, co ôni najprzōd niy mogōm ślecieć, ale – zaś ôptymista – wierzã, co tego niy zmłocōm i niy bydōm tak zawalaci jak niydŏwnŏ... Ruch. Sztyry manszafty ze Gōrnego Ślōnska we ekstraklasie to ryalnŏ wizyjõ a powrōt do normalności. A ślōnski klasyk to niy mŏ być inŏ rŏz, nale zŏwdy!